वाशिंगटन ।अमेरिकी अन्तरिक्ष एजेन्सी नासाद्वारा प्रकाशित उपग्रह तथ्याङ्कको प्रारम्भिक मूल्याङ्कन अनुसार गत हप्ता भेनेजुएलामा आएका शक्तिशाली दुईवटा भूकम्पका कारण ५८ हजारभन्दा बढी भवनहरू क्षतिग्रस्त भएको उल्लेख गरिएको छ ।
भेनेजुएलामा गत हप्ता ७.२ र ७.५ म्याग्निच्युडको भूकम्पमा परी एक हजार ७०० जनाको मृत्यु भएको पुष्टि हुनुका साथै हजारौँ अझै बेपत्ता भएको बताइएको छ ।
ओरेगन स्टेट युनिभर्सिटीका अनुसन्धानकर्ता कोरी शेर र जामोन भान डेन होकका अनुसार भूकम्पको भोलिपल्ट जुन–२५ मा सङ्कलन गरिएको उपग्रह राडार तथ्याङ्कको आधारमा “प्रभावित क्षेत्रमा लगभग ५८ हजार ८७० वटा भवनहरू क्षतिग्रस्त भएको जनाइएको हो ।”
युरोपेली अन्तरिक्ष एजेन्सीको “उच्च–रिजोल्युसन राडार इमेजरी उपग्रह सेन्टिनेल–१” बाट तथ्याङ्क उद्धृत गरिएको जनाइएको छ ।
यो प्रारम्भिक तथ्याङ्क र द्रुत मूल्याङ्कनले क्षतिसँग मिल्दोजुल्दो अवस्थालाई प्रतिबिम्बित गर्ने अनुसन्धानकर्ताहरूले बताएका छन् । उनीहरूका अनुसार यो तथ्याङ्क प्रमाणित हुने प्रक्रिया अझै बाँकी नै छ ।
नासाले उपग्रहहरूले “जमिनमा रहेका उद्धार टोलीहरूलाई प्रभावहरूको मूल्याङ्कन गर्न र प्रतिक्रिया प्रयासहरूलाई मार्ग–दर्शन गर्न मद्दत गर्नका लागि महत्त्वपूर्ण तथ्याङ्क उपलब्ध गराएको जनाएको छ ।” रासस
