बेइजिङ । शक्तिशाली टाइफुन डल्फिनले चीनको पूर्वी भूभागमा प्रभाव पारेपछि ठूलो संख्यामा मानिसलाई सुरक्षित स्थानमा सारिएको छ। आँधीसँगै आएको मुसलधारे वर्षा र तीव्र हावाले विभिन्न क्षेत्रमा जनजीवन प्रभावित पारेको छ। जोखिमयुक्त क्षेत्रबाट १० लाखभन्दा बढी मानिसलाई अन्यत्र सारिएको अधिकारीहरूले बताएका छन्।
डल्फिन आइतबार साँझ झेजियाङ प्रान्तको युहुआन क्षेत्रमा तटीय भूभागमा प्रवेश गरेको थियो। त्यसबेला आँधीको हावाको अधिकतम गति प्रतिघण्टा करिब १५१ किलोमिटर पुगेको थियो। भूभागमा प्रवेश गरेपछि यसको शक्ति केही कमजोर भए पनि वर्षाको प्रभाव भने व्यापक बनेको छ।
झेजियाङसँगै आनहुई, जियाङ्सु र शानडोङलगायत पूर्वी चीनका विभिन्न क्षेत्रमा भारी वर्षा भएको छ। कतिपय स्थानमा पानी जमेर सडक तथा बस्ती प्रभावित भएका छन् भने स्थानीय प्रशासनले बाढी र पहिरोको सम्भावित जोखिमलाई ध्यानमा राख्दै उद्धार संयन्त्रलाई तयारी अवस्थामा राखेको छ।
आँधीको प्रभावबाट सबैभन्दा बढी प्रभावित क्षेत्रमा प्रशासनले जोखिममा रहेका बासिन्दालाई सुरक्षित स्थानमा स्थानान्तरण गरेको छ। सम्भावित प्राकृतिक विपत्तिबाट हुने क्षति कम गर्न उद्धार तथा राहत टोली परिचालन गरिएको छ।
टाइफुनका कारण चीनको प्रमुख आर्थिक केन्द्र सांघाईको हवाई सेवा पनि प्रभावित भएको छ। सांघाईका दुई प्रमुख विमानस्थलबाट करिब ९४३ उडान रद्द गरिएको छ। खराब मौसमका कारण यात्रुहरूलाई आफ्नो उडानको अवस्था यकिन गरेर मात्र विमानस्थल जान आग्रह गरिएको छ।
सांघाईका केही क्षेत्रमा अत्यधिक वर्षाका कारण सडकमा पानी जमेको छ। जियाडिङ र छिङपुलगायत क्षेत्रमा आवागमनमा समस्या देखिएको छ। प्रतिकूल मौसमका कारण स्थानीय प्रशासनले केही गैरआवश्यक गतिविधि तथा सेवासमेत अस्थायी रूपमा रोक्ने निर्णय गरेको छ।
मौसमविद्हरूले डल्फिन कमजोर हुँदै गए पनि यसको प्रभाव पूर्ण रूपमा समाप्त नभएको बताएका छन्। आँधीबाट उत्पन्न वर्षाको प्रणाली मध्य चीनतर्फ सर्न सक्ने भएकाले केही क्षेत्रमा अझै बाढीको जोखिम कायम रहेको छ। हुबेई र हेनानलगायत क्षेत्रमा पनि भारी वर्षाको सम्भावनालाई लिएर सतर्कता अपनाइएको छ।
चीनमा यस वर्ष आएको शक्तिशाली उष्णकटिबन्धीय आँधीमध्ये डल्फिनलाई प्रमुख आँधीका रूपमा लिइएको छ। ठूलो संख्यामा मानिसको स्थानान्तरणसँगै हवाई तथा स्थल यातायात प्रभावित भएपछि अधिकारीहरूले उद्धार, राहत र विपद् व्यवस्थापनका कामलाई तीव्र बनाएका छन्।
