मुहानको पानी सोझै धरामा वितरण गरिएको भन्दै धरान १५ नम्बर वडाका जनप्रतिनिधि सहितको टोलीले भालु खोला र सेउतीको मुहानको पानी वितरण बन्द गर्न माग गरेका छन् ।
मंगलबार जनप्रतिनिधिसहित वडाका टोल विकास संस्था र राजनीतिक दलका प्रतिनिधि सहितको टोलीले नगर प्रमुख हर्क साम्पाङ लाई उक्त मुहानको पानी वितरण बन्द गर्न माग गरेका छन् ।
उनीहरूले स्रोत भन्दा माथि कुखुरा र बङ्गुरको फर्म रहेको र बर्खामा आउने बाढीले बगाएर मुहान मै ल्याउने भएकाले भालु खोला र सेउतीको मुहानको पानी वितरण बन्द गर्न माग गरेका हुन् ।
नगर प्रमुख साम्पाङले अभियान मार्फत खोलाबाट पानी रिजर्भेसन ट्याङ्कीमा समेत नहाली वितरण गरिदा महामारीका जोखिम बढेको भन्दै उक्त असन्तुष्टि पनि जनाएका छन् ।
उनीहरूले साम्पाङको अभियान पूर्व १५ नम्बर वडामा खानेपानी बोर्डको विजयपुर सब सिस्टमबाट पानी वितरण गरिने गरेकोमा भालु खोला र सेउतीको मुहानको पानी वितरण बन्द गरी पुनः विजयपुर सब सिस्टमबाट नै पानी वितरण गर्न माग गरेका छन् ।
वडा अध्यक्ष नरेश इवारम सहितको टिएलओ र राजनीतिक दलका प्रतिनिधिहरूको टोली यस अघि उक्त खोलाको मुहान क्षेत्रमा निरीक्षणका लागि गएका थिए । निरीक्षणका क्रममा मुहानमै पिउन अयोग्य पानी रहेको र कुनै ट्रिटमेन्ट बिनै वितरण गरेको पाइएकाले तत्काल ती मुहानको पानी वितरण बन्द गर्न माग गरिएको इवारमले बताएका छन् ।
